நெல்லையில் இருந்து தென்காசி, மதுரை வழியாக மேட்டு்ப்பாளையத்துக்கு சிறப்பு ரெயில் வருகிற 21-ந்தேதி முதல் இயக்கப்படுகிறது.
தென்னக ரெயில்வே சார்பில் நெல்லையில் இருந்து தென்காசி, மதுரை வழியாக மேட்டுப்பாளையத்துக்கு வாராந்திர சிறப்பு ரெயில் இயக்கப்படவுள்ளது. இந்த ரெயில் நெல்லையில் இருந்து வருகிற ஏப்ரல் 21-ந் தேதி முதல் ஜூன் மாதம் 30-ந் தேதி வரை வியாழக்கிழமைகளில் இயக்கப்படுகிறது. மறுமார்க்கத்தில், வருகிற 22-ந் தேதி முதல் ஜூலை 1-ந் தேதி வரை வெள்ளிக்கிழமைகளில் மேட்டுப்பாளையத்தில் இருந்து நெல்லைக்கு இயக்கப்படுகிறது. அதன்படி, இந்த ரெயில் (வ.எண்.06030) நெல்லையில் இருந்து இரவு 7 மணிக்கு புறப்பட்டு இரவு 8.30 மணிக்கு தென்காசி ரெயில் நிலையம் வந்தடைகிறது. நள்ளிரவு 12.50 மணிக்கு மதுரை ரெயில் நிலையம் வந்தடைகிறது. மறுநாள் காலை 6.25 மணிக்கு கோவைக்கும், 7.30 மணிக்கு மேட்டுப்பாளையம் ரெயில் நிலையத்துக்கும் சென்றடைகிறது.
நிற்கும் இடங்கள்
மறுமார்க்கத்தில் இந்த ரெயில் (வ.எண்.06029) மேட்டுப்பாளையத்தில் இருந்து இரவு 7.45 மணிக்கு புறப்பட்டு நள்ளிரவு 2.10 மணிக்கு மதுரை ரெயில் நிலையம் வந்தடைகிறது. மறுநாள் அதிகாலை 5 மணிக்கு தென்காசி ரெயில் நிலையம் சென்றடைகிறது. காலை 7.45 மணிக்கு நெல்லை சென்றடைகிறது. இந்த ரெயில்கள் சேரன்மகாதேவி, அம்பாசமுத்திரம், கீழக்கடையம், பாவூர்சத்திரம், தென்காசி, ராஜபாளையம், ஸ்ரீவில்லிபுத்தூர், சிவகாசி, விருதுநகர், மதுரை, திண்டுக்கல், ஒட்டன்சத்திரம், பழனி, உடுமலைப்பேட்டை, பொள்ளாச்சி, போத்தனூர், கோவை ஆகிய ரெயில் நிலையங்களில் நின்று செல்லும்.
இந்த ரெயிலில் ஒரு 2-அடுக்கு குளிரூட்டப்பட்ட பெட்டி, 2 மூன்றடுக்கு குளிரூட்டப்பட்ட பெட்டிகள், 7 இரண்டாம் வகுப்பு தூங்கும்வசதி பெட்டிகள், ஒரு பார்சல் வேனுடன் இணைந்த மாற்றுத்திறனாளிகளுக்கான பொதுப்பெட்டி இணைக்கப்பட்டிருக்கும். இந்த வாராந்திர சிறப்பு ரெயில் சிறப்பு கட்டணத்தில் இயக்கப்படுவதால், வழக்கமான எக்ஸ்பிரஸ் ரெயில் கட்டணத்தை விட கூடுதல் கட்டணம் வசூலிக்கப்படும். அதாவது, 10 சதவீத இருக்கைகள் முன்பதிவு செய்யப்பட்டவுடன் கட்டணம் உயர்ந்துவிடும்.
இருக்கைகளின் எண்ணிக்கை குறையும் போது, கட்டணம் அதிகரிக்கும் என்பது குறிப்பிடத்தக்கது.
இதையும் படிக்க: வனப்பகுதிக்குள் திசை தெரியாமல் அலைந்த பெண் – வினோத செடி உரசியதால் வழிதவறி சென்றதாக தகவல்
கோவை மாவட்டம் வால்பாறை அருகே உள்ள அக்காமலை எஸ்டேட் பகுதியை சேர்ந்தவர் சந்திரா என்கிற வேலுத்தாய் (வயது 54). தேயிலை பறிக்கும் வேலை செய்து வரும் இவர் விறகு எடுக்க அக்காமலை எஸ்டேட் அருகே உள்ள ஊசிமலை வனப்பகுதிக்குள் சென்றார்.
இது குறித்து சின்னக்கல்லார் பகுதியை சேர்ந்த பொதுமக்கள் கூறுகையில், ”அக்காமலை வனப்பகுதியில் ஏராளமான வினோதமான செடிகள் உள்ளன. இதில் திசைதிருப்பான் என்ற செடி உள்ளது. அது நம் மீது உரசினால் நமக்கு சுயநினைவு இருக்காது. இதனால் நாம் எங்கு செல்கிறோம் என்றே நமக்கு தெரியாது. அதன்படிதான் வனப்பகுதிக்குள் சென்ற வேலுத்தாய் மீது இந்த செடி உரசி உள்ளது. இதனால்தான் அவர் சுயநினைவை இழந்து திசை தெரியாமல் பல கி.மீ. தூரம் சுற்றி உள்ளார்.
பின்னர் சுயநினைவுக்கு வந்ததும், இருள் சூழ்ந்துவிட்டதை அறிந்த அவர் அங்குள்ள ஒரு பாறை இடுக்கில் இரவு முழுவதும் இருந்துள்ளார். பின்னர் காலையில் வனப்பகுதியை விட்டு வெளியே வந்து உள்ளார். இந்த வனப்பகுதியில் புலி, சிறுத்தை நடமாட்டம் அதிகம் உண்டு. சுயநினைவை இழந்துவிடுபவர்கள் அதிடம் சிக்கினால் அதோ கதிதான். நல்லவேளையாக வேலுத்தாய் வனவிலங்கிடம் சிக்க வில்லை. எனவே தனியாக அடர்ந்த வனப்பகுதிக்குள் செல்வதை தவிர்க்க வேண்டும்” என்று கூறினார்கள்.